«Зияткер мектептер түлектері қоғамдастығының» Alumni NIS бастамасымен бірлесе отырып, бірқатар NIS білім ордаларында «Samgau» форумы ұйымдастырылды. Бұл форумнан Шымкенттегі химия-биология бағытындағы NIS-те қалыс қалған жоқ. Форум барысында NIS түлектері мектеп қабырғасына қонақ ретінде келіп, өз тараптарынан оқушыларға қалай білмді жетілдіру керек, айқын мақсатқа қандай қадамдармен жетуге болатыны жайында сөз қозғап, әлемнің мықты оқу орындарының гранттарын бағындырудың жолдары жайында тың ақпараттармен бөлісті.
— Барлық мақсаттарға қорықпай, нық қадаммен тек алға жүріп, болашақта ешқандай мүмкіндіктерден мүлт қалмау керек, — дейді Назарбаев университетінің студенті, мектебіміздің түлегі Әлия Елшібай.
Форум барысында түлектермен бірге мектебіміздің 14 оқушысы өз жобаларын таныстырды. Оқушылар форумның өте жоғары деңдейде өткенін, түлектерден алған әрбір кеңестің пайдалы болғанын атап өтті. Өмірде жасаған саналы қадаммен өз мақсаттарына жетуге үлкен мотивация алғандарын қуана жеткізді.
Форумда Alumni NIS қоғамдастығының арнайы дайындалған заттары көрмеге қойылып, таныстырылды. Іс-шара соңында интерактивті ойындар ұйымдастырылып, белсенді әрі ұтқыр оқушыларға Alumni NIS қоғамдастығының заттары сыйға тартылды.
Форум соңы мектебіміздің түлектеріне оқушылардың дайындаған концерттік бағдарламасымен жалғасып, түлектерге алғыс хаттар берумен аяқталды.