Кентау қалалық емханасында Түркістан облыстық ЖИТС орталығының ұйымдастыруымен АШЫҚ есік күні болып өтті. Ашық есік күнінде мамандар тұрғындардан экспресс-тесттер алып, өз кеңестерімен бөлісті. Одан бөлек емханаға келген тұрғындарға ЖИТС-тен қалай сақтануға болатындығы туралы кеңінен жазылған үнпарақтар таратылды.

АИТВ немесе адам иммун тапшылығы вирусы – иммундық жүйе жасушаларына шабуыл жасайтын вирус. Ол ағзаның қорғаныс жүйесіне жауап беретін T-хелперлерді жойып, олардың орнын өздерінің көшірмесімен толтырады. Вирус қанша көп болса адамның иммунитеті де соншалықты төмен болады. Сондықтан ретровирусқа қарсы терапия қабылдамаған науқас жиі ауыратын болады. ЖИТС- жұқтырылған иммун тапшылығының синдромы: иммун тапшылығы – иммун жүйесінің зақымдануы және жұқпа ауруларға қарсы тұра алмау; синдром – осы аурудың белгісі мен симптомдардың жинағы.

Иммун жүйесі – өте күрделі, сыртқы шабуылдардан қорғайтын және организмнің қалыпты жұмысын қамтамасыз ететін адамға қажет жүйе. Біздің иммундық жүйеміз адам организміне кірген бөгде агенттерді жылдам танып, иммундық жауапты іске қосады.