Кентау қалалық емханасында «Алау» жастар денсаулық орталығы жұмыс істейді. Орталықтың басты мақсаты – жасөспірімдердің денсаулық жағдайын жақсарту, оларды зиянды әдеттерден қорғау. Орталықта гинеколог, нарколог, жалпы тәжірбиелі дәрігер мен психолог мамандар қызмет атқарады.

Мамандар әр тоқсан сайын қаладағы мектеп және колледж жастарымен кездесу өткізіп отырады. Сондай кездесулердің бірі қаладағы Арнаулы кәсіптік колледжі мен жалпы білім беретін 4-ші мектепте Дүниежүзілік ЖИТС-ке қарсы күрес күніне орай өтті. Кездесуде емхананың нарколог дәрігері Әсем Смайлова жастарға есірткілік психотропты және алкогольдік заттардың зияны туралы айта отырып, олардың салдарынан туындайтын аурулар жайлы кеңінен мағұлмат берді. Кеңінен әңгіме қозғай отырып зиянды әдеттерден аулақ болуға, салауатты өмір салтын ұстауға шақырды. Ал, жалпы тәжірбиелі дәрігер студенттерге ЖИТС ауруы туралы айта отырып, оның алдын алу жолдарын түсіндірді.

Кездесу барысында психолог мамандар студенттерге психологиялық тренингтер ұйымдастырып, жастарға психикалық денсаулық туралы, күйзелістен қалай арылуға болатындығы туралы пайдалы кеңестерімен бөлісті.

Кездесу соңында студенттер тарапынан сұрақтар қойылып, тұщымды жауап берілді.