Бүгін аудан әкімінің міндетін уақытша атқарушы Нурполат Талипов Жібек жолы ауылдық округінің тұрғындарымен кездесіп, ағымдағы жылы аудан көлемінде атқарылған жұмыстарға тоқталып, алдағы жоспарларды баяндады.

Кездесуде және жеке қабылдауда тұрғындар тарапынан жол жөндеу, дәрігерлік емхана, мәдениет үйін салу, ауыз су және ағын су, жарықтандыру, аяқ жол салу, тұрғын үйлерді құжаттандыру, тазалық, табиғи газ, тұрғын үй салу үшін жер учаскесін беру және жеке мәселелері бойынша сұрақтар қойылып, өтініштер айтылды. Әр тұрғынның мәселесін мұқият тыңдаған Н.Талипов әрбір ұсыныс пен өтініш хаттамаға енгізіліп, тиісті жұмыс жүретінін айтты.

Ағымдағы жылы Жібек жолы елді мекеніндегі №58 Ә.Марғұлан атындағы жалпы орта мектеп ғимаратын күрделі жөндеуден өткізу үшін бюджеттен қаржы бөлініп, мердігер мекеме тарапынан күрделі жөндеу жұмыстары жүргізілуде. Құрылыс жұмыстары келесі жылға өтпелі.

Сонымен қатар, Жібек жолы елді мекеніндегі Өркен көшесінің 1,1 шақырымы және Дихан баба елді мекеніндегі Ынтымақ көшесінің 2 шақырымын орташа жөндеуден өткізу үшін бюджеттен қаржы бөлініп, бүгінгі таңда құрылыс жұмыстары аяқталып тұрғындар игілігі үшін пайдалануға берілген.

Дихан баба елді мекеніне мәдениет үйін салу үшін бюджеттен қаржы бөлініп, қазіргі таңда мердігер мекеме тарапынан мәдениет үйінің құрылыс жұмыстары жүргізілуде. Құрылыс жұмыстары келесі жылға өтпелі.

(с) Сарыағаш ауданы әкімдігінің баспасөз қызметі